༈ ཀ་དག་གཞིར་རྫོགས་ཆོས་སྐུ་ཀུན་ཏུ་བཟང་། །ཁ་སྦྱོར་ཡན་ལག་བདུན་ལྡན་རྡོ་རྗེ་འཆང་། །ག་སར་ཆུ་ཟླའི་གར་གྱིས་སྤྲུལ་པའི་སྐུ། །ང་ཡི་སློབ་དཔོན་ཡེ་ཤེས་རིན་ཆེན་རྒྱལ། །ཅ་དག་རྣམ༌ལྔའི་ཡེ་ཤེས་ཀུ༌མུད༌གཉེན། །ཆ་མཉམ༌རིན་ཆེན་རྡུལ༌གྱི༌འོད༌ཟེར༌ཅན། །ཇ་ཐུན་རེ་རེར་འགྲོ་བའི་མུན་བསལ་ཟླ། །ཉ་རྒྱས་སློབ་དཔོན་ཡེ་ཤེས་རིན་ཆེན་རྒྱལ། །ཏ་ཡས་ལེགས་བཤད་རིན་ཆེན་གླིང་ཕྱིན་ཏེ། །ཐ་དག་གཞུང་ལུགས་རྒྱ་མཚོའི་གཏིང་དཔོག་ཀྱང་། །ད་དུང་རྣམ་དཀར་གྲུར་བཞུད་མི་འདོར་བ། །ན་མོ་གུ་རུ་ཡེ་ཤེས་རིན་ཆེན་རྒྱལ། །པ་ར་མི་ཏའི་མཁྱེན་རབ་གཏིང་ཟབ་ཅིང་། །ཕ་ཟད་གཉུག་མའི་རྟོགས་པ་དགུང་ལས་མཐོ། །བཛྲ་དྷ་རའི་རྒྱལ་སར་མངའ༌དབང་བསྒྱུར། །མ་ཧཱ་སློབ་དཔོན་ཡེ་ཤེས་རིན་ཆེན་རྒྱལ། །ཙ༌རེའི༌བྱམས༌པས༌སྤོས༌ངད༌ལྡན༌པའི༌ཁྱུར། །ཚ་གདུང་ཡོངས་འདུལ་ཆོས་ཀྱི་ཟིལ་མངར་གྱིས། །ཛ་དྲག་སེམས་ལ་ངལ་གསོ་སྟེར་བའི་ཚུལ། །ཝ་ཝལ་ཀློང་ཆེན་ཡེ་ཤེས་རིན་ཆེན་རྒྱལ། །ཞ་ཐུལ་ངུར་སྨིག་སྐོན་པས་ཉམས་ཆུང་ཡང་། །ཟ་བེར་འདུང་མ་གསོལ་བའི་གཟི་བརྗིད་ཀྱིས། །འ་ཅག་དད་པའི་ཡིད་དབང་འཕྲོག་པའི་སྐུ། །ཡ་མཚན་སློབ་དཔོན་ཡེ་ཤེས་རིན་ཆེན་རྒྱལ། །ར་འཕྲོད་གཞི་དབྱིངས་འདུ་འབྲལ་མེད་པའི་གཤིས། །ལ་རྩེ་མར་བལྟས་རྗེས་སུ་ཆགས་པའི་མིག །ཤ་ཚས་འབངས་འཁོར་ཀུན་ལ་སྟེར་བའི་ཐུཊ། །ས་བརྟོལ་སློབ་དཔོན་ཡེ་ཤེས་རིན་ཆེན་རྒྱལ། །ཧ་ནི་སྐྱེ༌འགྲོར༌དཔྱིད༌ཀྱི༌ཕོ༌ཉ༌དང་། །ཧ༌རེར་འཆི་མེད་ལྷ་ཡི་མགྲིན་དབྱངས་ཀྱིས། །ཨ༌དོན༌སྐྱེ༌མེད་གནས་ལུགས་འཆད་པའི་གསུང། །ཨ༌ཧོ༌སློབ་དཔོན་ཡེ་ཤེས་རིན་ཆེན་རྒྱལ། །ཨི་ཐི་ཇི་བཞིན་གཟིགས་པའི་རིགས་ཀྱི་བདག །ཨུ་ཐུག་བླུན་བུས་གདུང་བསྐུལ་ཞུ་འཁྲུལ་ན། །ཨེ་ཧེ་ཁྲེལ་འདེབས་ཡེ་མེད་རྗེས་བརྩེ་ངང་། །ཨོ་ལོ་ཟོབ་འཆོལ་དགོངས་ཀློང་མཐོལ་ལོ་བཤགས། །དེ་ལྟར་དབྱངས་གསལ་འདབ་བརྒྱའི་ཆུན་པོ་ཞིག །དད་པའི་སྙིང་གི་སྐྱེད་མོའི་ཚལ་ནས་བླངས། །དྲ་བརྒྱའི་ལྷ་ལམ་དབྱིངས་སུ་གཏོར་བ་ཡིས། །དོན་གྱི་སློབ་དཔོན་མཉེས་པའི་རྒྱུར་གྱུར་ཅིག ། ། །ཅེས་པའི་བསྔགས་བརྗོད་འདིའང་བཀའ་དྲིན་གསུམ་ལྡན་གྱི་དམ་པ་འདི་ཉིད་ ཡང་ཡང་རྨི་ལམ་དུ་མཇལ་བས་རྐྱེན་བྱས་ཏེ་ སྐུ་དྲིན་ལན་ལོན་གྱི་མཐུ་མེད་ཀྱང་ དད་དམ་གསར་གཏོད་ཀྱི་དྲན་རྟེན་དུ་ ཨ་ཏི་ཡོ་གའི་རྣལ་འབྱོར་པ་ཀརྨའམ་ རིག་འཛིན་རྒྱུ་སྐར་དབང་པོས་ རང་སྣང་འོད་གསལ་སྤྲིན་གྱི་སྐྱེད་ཚལ་ནས་ཕུལ་བའོ། །
Updated on: 10/19/2023.
ཤོག་ལྷེ་འདིར་གཞི་ནས་སློབ་དཔོན་གྱི་མཛད་རྣམ་ཉུང་བསྡུས་ཤིག་སྤེལ་ཡོད་པ་དེ་ རེ་ཞིག་ཕྱིར་འབུད་བཏང་ཡོད་པས་ དེའི་ཚབ་ཏུ་སློབ་དཔོན་རིན་པོ་ཆེའི་གསུང་སྨོན་ཟབ་མོ་འདི་གཟིགས་པར་ཞུ།
༈ སྐྱབས་ཡུལ་དམ་པ་རྣམས་ལ་ཐུགས་བརྒྱུད་བསྐུལ་བའི་གསོལ་འདེབས་ཡིད་ཆེས་དད་པའི་ཕོ་ཉ་ཞེས་བྱ་བ་བཞུགས་སོ། །
༄༅། །དྲི་མེད་མཁྱེན་རབ་ཡོངས་རྫོགས་ཐུབ་པའི་དབང༌། །དུས་གསུམ་རྒྱལ་བའི་ཡབ་གྱུར་འཇམ་པའི་དབྱངས། །སྤྱན་རས་གཟིགས་སོགས་སྐྱབས་ཡུལ་མཆོག་རྣམས་ཀྱིས། །བདག་སོགས་འགྲོ་ལ་གཡེལ་མེད་ཐུགས་རྗེས་དགོངས། །ཐོག་མེད་དུས་ནས་འཁོར་བའི་རྒྱ་མཚོ་འདིར། །ལས་ངན་ཁུར་གྱིས་ནོན་པ་མ་ཚོར་བར། །ད་དུང་འཁོར་བའི་གཡང་སར་མི་འཇིགས་པའི། །མ་རྒན་སེམས་ཅན་འདི་རྣམས་བསྐྱབ་ཏུ་གསོལ། །བསགས་རྒྱབ་དུ་མས་བསྐྲུན་པའི་རྟེན་བཟང་མཆོག །རང་ལག་ཡོད་དུས་གཏན་བདེ་མི་སྒྲུབ་པར། །སྡུག་བསྔལ་རྒྱུ་ཚོགས་མང་པོ་ཉེར་བསྐྱེད་པའི། །འགྲོ་རྣམས་འཁོར་བའི་མཚོ་ལས་བསྒྲལ་དུ་གསོལ། །རྙེད་དཀའ་འཇིག་སླའི་ལུས་རྟེན་ཡུན་རིང་དུ། །མི་སྡོད་ངེས་པའི་གོ་བ་ཙམ་ཡོད་ཀྱང༌། །གཏན་དུ་བསྡད་པའི་གཤོམ་རས་བརྒྱུད་དཀྲུགས་ནས། །འཆི་མེད་རྟག་རྩིས་བྱེད་རྣམས་ཐུགས་རྗེས་ཟུངས། །ལས་འབྲས་བསླུ་མེད་སྟོན་པ་དམ་པའི་ཆོས། །མང་དུ་ཐོས་ཀྱང་ཐོས་དོན་མ་བསམ་པས། །ལས་འབྲས་ཁྱད་དུ་གསོད་པའི་འགྲོ་བ་རྣམས། །སྤང་བླང་འཁྲུལ་མེད་ཤེས་པའི་ཐུགས་རྗེས་སྐྱོབས། །འཁོར་བའི་གནས་འདིར་མཐོ་དམན་གར་སྐྱེས་ཀྱང་། །སྡུག་བསྔལ་རྦ་ཀློང་འཁྲུགས་པའི་འཕྲུལ་འཁོར་ལས། །གཏན་བདེ་མེད་པ་ཤེས་ཀྱང་སྐྱོ་བའི་སེམས། །ནམ་ལངས་སྐར་ལྟར་གྱུར་པའི་ཚུལ་ལ་དགོངས། །མ་འདྲིས་འགྲོ་བའི་གཉེན་གྱུར་དགེ་བའི་བཤེས། །མ་བཅོལ་ཕན་བདེ་སྒྲུབ་པའི་གདམས་པ་རྣམས། །སྙིང་ལ་མི་འཛིན་འཆལ་བའི་ཤེས་རབ་ཀྱིས། །ལོག་ལམ་མཆོག་ཏུ་འཛིན་རྣམས་བསྐྱབ་ཏུ་གསོལ། །རང་འདོད་འཁྲི་མེད་གཞན་ཕན་ལྷག་བསམ་གྱིས། །ཡང་དག་ལམ་ལ་བསྐུལ་བའི་ཐབས་བསྟན་ཀྱང༌། །ཆོས་མིན་སྤྱོད་པ་དབྱར་མཚོ་ལྟར་འཕེལ་བའི། །འགྲོ་རྣམས་ཡང་དག་ལམ་ལ་དྲང་དུ་གསོལ། །རང་ཕན་ལས་ལ་ཐབས་ཀྱིས་བསྐུལ་ཡང་གཟུར། །གཏན་བདེ་འཇོམས་པའི་ལས་ལ་ངང་གིས་འཇུག །བཙན་དུག་ཟས་སུ་རློམ་འདྲའི་མ་རྒན་རྣམས། །སྤང་བླང་ཤེས་པའི་ལམ་ལ་འདྲེན་དུ་གསོལ། །ངེས་འབྱུང་མེད་པ་སོ་ཐར་སྒོར་ཞུགས་པས། །སྤང་བླང་གནད་ལ་གུས་པ་དམན་པའི་མཐུས། །ཉེས་བྱས་ལ་སོགས་ལྟ་ཅི་ཕམ་པ་ཡང༌། །རྩིས་མེད་ཡལ་བར་དོར་རྣམས་བརྩེ་བས་དགོངས། །དུས་གསུམ་རྒྱལ་བས་བསྔགས་པའི་བྱང་ཆུབ་སེམས། །རྒྱུད་ལ་བསྟེན་ནས་གཞན་ཕན་སྒྲུབ་བོ་ཞེས། །ཁས་ལེན་མཐོ་ལ་ལག་ལེན་མེད་པ་ཡི། །གཡོ་སྒྱུ་ཅན་རྣམས་བསྐྱབ་པར་མཛོད་ཅིག་ཀྱེ། །ཉེ་ལམ་རྡོ་རྗེ་ཐེག་པའི་སྒོར་ཞུགས་ནས། །སྨིན་གྲོལ་གཟུགས་བརྙན་ཙམ་ལས་དོན་གྱི་གནད། །གོ་ཡུལ་ཙམ་དུ་ལུས་པ་མ་ཚོར་བའི། །སྔགས་པའི་མིང་འཛིན་བདག་ཅག་བསྐྱབ་ཏུ་གསོལ། །མདོར་ན་ཆོས་སྒོར་ཞུགས་ནས་ཆོས་མིན་གྱི། །སྤྱོད་པས་ཉིན་མཚན་འདའ་བའི་མ་རྒན་རྣམས། །འདོར་བ་མ་ཕོད་བསྐྱབ་པར་མ་ནུས་པའི། །སྐྱོ་བའི་ངང་ཚུལ་ལ་དགོངས་ཐུགས་རྗེས་ཟུངས། །བདག་གི་ལྷག་བསམ་དག་པས་གསོལ་བའི་དོན། །ཇི་བཞིན་འགྲུབ་པའི་འབྲས་བཟང་མྱུར་སྨིན་ནས། །མཐའ་མེད་འཁོར་བར་འཁྱམས་པའི་འགྲོ་བ་རྣམས། །མྱུར་དུ་རྣམ་མཁྱེན་འབྲས་བཟང་མངོན་གྱུར་ཤོག །བདག་ཀྱང་འདི་ནས་ཚེ་རབས་ཐམས་ཅད་དུ། །དུས་གསུམ་རྒྱལ་བའི་འཕྲིན་ལས་བརྒྱུད་སྨིན་ནས། །རྨུགས་རྒོད་སེམས་ཅན་གང་དུ་དར་བའི་སར། །སྐྱེས་ནས་བྱང་ཆུབ་ལམ་བཟང་སྟོན་ནུས་ཤོག །དེ་ལྟར་སྙིང་ནས་གསོལ་བཏབ་སྨོན་པའི་མཐུས། །སྔོན་སྨོན་ལས་མཐུན་འདིར་འདུས་སྐྱེས་བུ་རྣམས། །ཉེས་ཚོགས་རབ་ཞི་ཡང་དག་ལྟ་བ་ལ། །གོམས་ནས་རྣམ་མཁྱེན་འབྲས་བཟང་མངོན་གྱུར་ཤོག ། ། །ཅེས་པ་འདིའང་རང་ཉིད་ཆུང་ནས་ཆོས་སྒོར་ཞུགས་ནས་བཤེས་གཉེན་དམ་པས་ཚེ་རབས་ཐམས་ཅད་དུ། རྗེས་སུ་བཟུང་སྟེ་རྒས་ཁར་ཐུག་ཀྱང་ ལྟ་སྒོམ་རྣམ་དག་བརྒྱུད་ལ་སྐྱེར་མ་བཏུབ་པས་ དལ་རྟེན་ཆུད་ཟོས་སུ་སོང་བར་ཡིད་སྐྱོ་བའི་ཁར། རང་ལྟོས་རྣམས་ཀྱང་ ཡང་དག་ལམ་ལ་ཡིད་ཆེས་ཡོད་པ་ཆེར་མ་མཐོང་བས་ སྐྱབས་ཡུལ་དམ་པ་རྣམས་ལ་ར་མདའ་འདྲེན་པའི་ཚུལ་དུ་ བློ་ལ་གང་ཤར་སྨོས་པ་འདིའང་སྤྲང་སྨྱོན་ཡེ་ཤེས་རིན་ཆེན་མིང་པས་ རང་གནས་ཁྱུང་དགོན་རི་ཁྲོད་དུ་བྲིས་པ་དགེའོ། ། ། །
