ཞབས་བརྟན་མོས་གུས་གདུང་དབྱངས་ཀྱི་མཆོད་སྤྲིན།

༄༅། །ན་མོ་གུ་རུ༑ ཀ་དག་ཡེ་ཤེས་ལྷུན་གྲུབ་དྭངས་མའི་སྦུབས། །ཆ་སྙོམས་སྐུ་གསུམ་འདུ་འབྲལ་མེད་པའི་ཀློང་། །ད་གཟོད་ཆོས་ཉིད་ཡེ་གྲོལ་ཐིག་ལེའི་རྩལ། །མ་སྒྲིབ་ཀུན་ཁྱབ་རིན་ཆེན་ཞབས་བརྟན་གསོལ། །ཙ་རེར་ཉག་ཅིག་དྲི་མེད་ཟང་ཐལ་གཞི། །ཟ་འོག་གཏིང་གསལ་ལྷུན་གྲུབ་འོད་ཟེར་དབྱིངས། །ཤ་སྟག་རབ་འབྱམས་ཀུན་འདུས་ཛྙཱ་ནའི་གདངས། །ཨ་དོན་གུ་རུ་རཏྣ་ཞབས་བརྟན་གསོལ། །ཨི་ནུས་ཐུགས་རྗེས་འགྲོ་རྣམས་སྒྲོལ་བའི་ཕྱིར། །ཨུ་ནན་རང་བཞིན་གང་འདུལ་མཛད་འཕྲིན་གྱི། །ཨེ་ཝཾ་ངོ་བོ་འབྲེལ་ཚད་དོན་ལྡན་སྐུ། །ཨོ་རྒྱན་རིགས་ཀྱི་བདག་པོ་ཞབས་བརྟན་གསོལ། །དེ་ལྟར་སྙིང་ནས་གསོལ་བ་བཏབ་པ་དང་། །ཆོས་ཅན་ཆོས་ཉིད་བསླུ་མེད་རྟེན་འབྲེལ་དང་། །གང་གི་ཐུགས་བསྐྱེད་བླ་ན་མེད་པའི་མཐུས། །མགོན་ཁྱོད་སྐུ་ཚེ་སྐལ་བརྒྱར་བརྟན་གྱུར་ཅིག །ནམ་ཞིག་མགོན་ཁྱོད་མངོན་དགར་ཕེབས་པའི་ཚེ། །རྨུགས་རྒོད་བདག་འདྲ་ཡལ་བར་མི་དོར་བར། །མཁྱེན་བརྩེ་ནུས་པའི་ཐུགས་རྗེའི་དཔྱང་ཐག་གིས། །སྐུ་ཡི་གྲིབ་བཞིན་འཁྲིད་པར་མཁྱེན་མཁྱེན་ནོ། །ཞེས་པའང་༑ བཀའ་དྲིན་གསུམ་ལྡན་གྱི་བདག་ཉིད་ཅན། །སྐུ་བཞི་རང་རྫོགས་ཀྱི་སློབ་དཔོན་ཆེ། །ཡེ་ཤེས་རིན་ཆེན་གྱི་མཚན་ཅན་ལ། །གསོལ་འདེབས་གདུང་དབྱངས་ཀྱི་མཆོད་སྤྲིན་འདི། །ཨར་འདམ་བྲག་རོང་གི་རི་ཁྲོད་ནས། །གུས་འབངས་རྒྱུ་སྐར་གྱི་དབང་པོ་ཡིས། །ལྷག་བསམ་ཀུན་བླངས་ཀྱི་དང་བས་ཕུལ། །རྣམ་དཀར་དོན་ལྡན་དུ་འགྱུར་བར་ཤོག ། ། ། སརྦ་མངྒ་ལཾ། ། 

དྲན་ཐོ༑ གསོལ་འདེབས་འདི་ནི་སློབ་དཔོན་རིན་པོ་ཆེ་ཞིང་དུ་མ་གཤེགས་པའི་ཟླ་བ་གཅིག་གི་གོང་དུ། རང་ཉིད་འཆི་བདག་རང་གྲོལ་གྱི་རི་ཁྲོད་དུ་སྒོམ་དུ་སོང་བའི་ཚེ། ཞབས་བརྟན་གསོལ་འདེབས་སུ་བཀོད་པ་ལས། སླར་སློབ་དཔོན་རིན་པོ་ཆེ་གསོལ་མ་ཐེབ་པར་འདས་པའི་རྗེས་སུ། མོས་གདུང་གི་གསོལ་འདེབས་སུ་བསྒྱུར་བ་ལགས་སོ། །