༄༅། །ན་མོ་གུ་རུ་དེ་ཝ་ཌཱ་ཀི་ནཱི་བཛྲ་ཀྲོ་དྷི་ཀ་ལི་ཡེ༔ ངོ་བོ་གདོད་ནས་དག་པའི་དཀྱིལ་འཁོར་དུ། །གཞོམ་མེད་བླ་མ་འདུས་པ་རྒྱ་མཚོའི་སྐུ། །གང་ལ་གང་འདུལ་སྒྱུ་འཕྲུལ་བསམ་ཡས་པ། །སྤྲུལ་སྐུ་དགའ་རབ་རྡོ་རྗེར་ཞབས་བརྟན་གསོལ། །རང་བཞིན་ལྷུན་གྱིས་གྲུབ་པའི་དཀྱིལ་འཁོར་དུ། །འཁྲུལ་མེད་བླ་མ་དམ་ཆོས་བདུད་རྩིའི་གསུང་། །ཟབ་གསང་འཛད་མེད་བདུད་འཇོམས་རྡོ་རྗེའི་གདངས། །གསུང་སྤྲུལ་དགའ་རབ་རྡོ་རྗེར་ཞབས་བརྟན་གསོལ། །ཐུགས་རྗེ་བྱང་ཆུབ་སེམས་ཀྱི་དཀྱིལ་འཁོར་དུ། །སྒྲིབ་མེད་བླ་མ་སངས་རྒྱས་ཀུན་གྱི་ཐུགས། །དབྱིངས་དང་ཡེ་ཤེས་ཀུན་བཟང་དགོངས་པའི་ཀློང་། །ཐུགས་སྤྲུལ་དགའ་རབ་རྡོ་རྗེར་ཞབས་བརྟན་གསོལ། །མ་གཅིག་ཀྲོ་དྷི་ཀ་ལིའི་དཀྱིལ་འཁོར་དུ། །གསང་གསུམ་བླ་མ་སྐུ་བཞིའི་བདག་ཉིད་མཆོག །རང་སེམས་ཁྲོས་མར་ངོ་སྤྲོད་མཛད་པ་པོ། །ཡང་སྤྲུལ་དགའ་རབ་རྡོ་རྗེར་ཞབས་བརྟན་གསོལ། །དེ་ལྟར་སྙིང་ནས་གསོལ་བ་བཏབ་པ་དང་། །རིག་འཛིན་རྒྱལ་བ་རྒྱ་མཚོའི་བྱིན་བརླབ་དང་། །མ་གཅིག་ཁྲོས་མ་ནག་མོའི་མཐུ་སྟོབས་ཀྱིས། །མགོན་ཁྱོད་སྐུ་ཚེ་བསྐལ་བརྒྱར་བརྟན་གྱུར་ཅིག །ཨོཾ་བཛྲ་ཀྲོ་དྷི་ཀ་ལི་བྃ་ཧ་རི་ནི་ས་སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱ༔ ཞེས་པའང་སྨན་བརྩུན་མཁའ་འགྲོས་བསྐུལ་བའི་ངོར། །ནུབ་གླིང་ཨར་འདམ་བྲག་རོང་རི་ཁྲོད་ཀྱི། །གསང་ཕུག་འོད་གསལ་སྤྲིན་གྱི་སྐྱེད་ཚལ་ནས། །རིག་འཛིན་དྲ་རྒྱའི་མཁར་ལྡིང་དབང་པོས་ཕུལ། ། ། །སརྦ་མངྒ་ལཾ། །
