༄༅། །ན་མོ་གུ་རུ་དེ་ཝ་ཌཱ་ཀི་ནཱི་བཛྲ་ཀྲོ་དྷི་ཀཱ་ལཱི་ཡེ༔ ངོ་བོ་རྣམ་གྲོལ་གཞི་ཡི་དཀྱིལ་འཁོར་དུ། །གཞོམ་མེད་བླ་མ་འདུས་པ་རྒྱ་མཚོའི་སྐུ། །གང་འདུལ་སྒྱུ་འཕྲུལ་འགགས་པ་མེད་པའི་དཔྱིད། །སྤྲུལ་སྐུ་དགའ་རབ་རྡོ་རྗེ་ཞབས་བརྟན་གསོལ། །རང་བཞིན་སྣང་བ་ལམ་གྱི་དཀྱིལ་འཁོར་དུ། །འཁྲུལ་མེད་བླ་མ་ཟབ་གཏེར་བདུད་རྩིའི་གསུང་། །ངེས་གསང་འཛད་མེད་བདུད་འཇོམས་རྡོ་རྗེའི་གདངས། །གསུང་སྤྲུལ་དགའ་རབ་རྡོ་རྗེ་ཞབས་བརྟན་གསོལ། །ཐུགས་རྗེ་རང་གྲོལ་བྱར་མེད་དཀྱིལ་འཁོར་དུ། །སྒྲིབ་མེད་བླ་མ་སངས་རྒྱས་ཀུན་གྱི་ཐུགས། །རང་བྱུང་དབྱིངས་དང་ཡེ་ཤེས་ཟང་ཐལ་ཀློང་། །ཐུགས་སྤྲུལ་དགའ་རབ་རྡོ་རྗེ་ཞབས་བརྟན་གསོལ། །ཡུམ་གཅིག་ཀྲོ་དྷི་ཀཱ་ལཱིའི་དཀྱིལ་འཁོར་དུ། །དབྱེར་མེད་བླ་མ་སྐུ་གསུམ་མཁའ་འགྲོའི་རྩལ། །གསང་ཆེན་ཉེ་ལམ་ཀུན་འགྲོར་སྣང་བའི་མཛོད། །ཡང་སྤྲུལ་དགའ་རབ་རྡོ་རྗེ་ཞབས་བརྟན་གསོལ། །དེ་ལྟར་གསོལ་བ་བཏབ་པའི་བདེན་པ་དང་། །རིག་འཛིན་རྒྱལ་བ་རྒྱ་མཚོའི་བྱིན་བརླབ་དང་། །མ་གཅིག་ཁྲོས་མ་ནག་མོའི་མཐུ་སྟོབས་ཀྱིས། །མགོན་ཁྱོད་སྐུ་ཚེ་བསྐལ་བརྒྱར་བརྟན་གྱུར་ཅིག །ཨོཾ་བཛྲ་ཀྲོ་དྷི་ཀཱ་ལཱི་བྃ་ཧ་རི་ནི་ས་སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱ༔ ཞེས་པའང་ལྷོ་མོན་ཤིང་ལོའི་ཚལ་གྱི་དབུས། །སུམ་རྩེན་ཉལ་འགྲོར་འཁྱུད་པའི་སྣང་བརྙན་བཞིན། །འདོད་མགུ་རང་བྱུང་དཔག་བསམ་འཁྲུངས་པའི་འགྲམ། །སྐལ་ལྡན་ཁྲོས་མ་ཉམས་ལེན་འདུས་ས་ལས། །ཆོས་དབྱིངས་གསང་མཆོག་དགའ་མས་བསྐུལ་བའི་ངོར། །ནུབ་གླིང་ཨར་འདམ་བྲག་རོང་རི་ཁྲོད་ཀྱི། །གསང་ཕུག་འོད་གསལ་སྤྲིན་གྱི་སྐྱེད་ཚལ་ནས། །རིག་འཛིན་དྲ་རྒྱའི་མཁར་ལྡིང་དབང་པོས་བྲིས། ། ། །སརྦ་མངྒ་ལཾ། །
གོང་གི་སྔགས་ཀྱི་གོ་དོན།
༈ ན་མོ་གུ་རུ་དེ་ཝ་ཌཱ་ཀི་ནཱི་བཛྲ་ཀྲོ་དྷི་ཀཱ་ལཱི་ཡེ༔
བླ་མ་ཡི་དམ་མཁའ་འགྲོ་རྡོ་རྗེ་ཁྲོས་མ་ནག་མོ་ལ་ཕྱག་འཚལ་ལོ།།
༈ ཨོཾ་བཛྲ་ཀྲོ་དྷི་ཀཱ་ལཱི་བྃ་ཧ་རི་ནི་ས་སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱ༔
བཛྲ་་་་རྡོ་རྗེ། ཀྲོ་དྷི་་་་ཁྲོས་མ། ཀཱ་ལཱི་་་་ནག་མོ། བཾ་་་་རྡོ་རྗེ་ཁྲོས་མ་ནག་མོའི་ས་བོན། ཧ་་་་་ཤར་དུ་རྡོ་རྗེ་མཁའ་འགྲོ་མའི་ས་བོན། རི་་་ལྷོར་རིན་ཆེན་མཁའ་འགྲོ་མའི་ས་བོན། ནི་་་་ནུབ་ཏུ་པདྨ་མཁའ་འགྲོ་མའི་ས་བོན། ས་་་་་བྱང་དུ་ལས་ཀྱི་མཁའ་འགྲོ་མའི་ས་བོན། སརྦ་པཱ་པཾ་་་་་སྡིག་པ་ཐམས་ཅད། ཤཱནྟིཾ་་་་་་ཞི་བར། ཀུ་རུ་་་་་ མཛོད་ཅིག། ཡེ་་་་་གང་དག་དེ་རྣམས། སྭཱཧཱ་་་་་བྱིན་གིས་རློབས་ཤིག། ཅེས་དགེ་དཀར་ཅུང་གིས་གོང་མའི་ཡིག་ཆ་རྣམས་ལ་ཁུངས་གཏུགས་བགྱིས་ཏེ་ཕུལ། །
ཁྲོས་མའི་སྔགས་དོན་ཚིགས་སུ་བཅད་པ་ནི།
ཨོཾ་བཛྲ་ཀྲོ་དྷི་ཀཱ་ལཱི་བྃ་ཧ་རི་ནི་ས་སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱ༔
༂ རྡོ་རྗེ་ཁྲོས་མ་ནག་མོ་དང་༔ ཕྱོགས་བཞིའི་མཁའ་འགྲོ་མ་རྣམས་ཀྱིས༔ སྡིག་སྒྲིབ་ཐམས་ཅད་ཞི་བ་དང་༔ བྱིན་བརླབ་དངོས་གྲུབ་ཐམས་ཅད་སྩོལ༔ ཞེས་པའི་ཚིག་རྐང་བཞི་པོ་ནི་ སྒྲ་དོན་སྒྱུར་གྱི་ཁུལ་དུ་བཀོད་པ་དགེའོ། །
